Ommaviy oferta

"UzCloud" platformasidan foydalanish va xizmatlarni taqdim etish shartlari

Ushbu «UzCloud» platformasidan foydalanish va xizmatlarni taqdim etish shartlari jismoniy va yuridik shaxslar, shuningdek, yuridik shaxsni tashkil qilmasdan tadbirkorlik yoki boshqa faoliyatni amalga oshirayotgan fuqarolik-huquqiy munosabatlar ishtirokchilari bo'lgan shaxslar (keyingi o'rinlarda – Foydalanuvchi) uchun Internet tarmog'ida bulutli xizmatlardan foydalanish tartibini belgilaydi.

I. Umumiy shartlar

1.1. «O'zbektelekom» aksiyadorlik kompaniyasi (keyingi o'rinlarda – Provayder) tomonidan Foydalanuvchiga ushbu Shartlarga muvofiq Platformaga kirish imkoniyati taqdim etadi.

1.2. Xizmatlar ushbu Shartlarda belgilangan tartibda pullik asosda ko'rsatiladi.

1.3. Jismoniy shaxslar tomonidan Provayder portalida (uzcloud.uz) ro'yxatdan o'tilishi va MyID orqali verifikatsiya qilinishi Ofertaning aksepti hisoblanadi.

1.4. Yuridik shaxslarga xizmatlar elektron shaklda tuziladigan shartnoma asosida taqdim etiladi.

II. Asosiy atama va ta'riflar

• 2.1 Aksept — Oferta yo'llangan shaxsning uni qabul qilish to'g'risidagi javobi (Shartnomani imzolash).
• 2.2 Oferta — muayyan shaxsga yoki cheklanmagan miqdordagi shaxslarga qaratilgan shartnomaning muhim shartlarini belgilab beruvchi bitim tuzish taklifi.
• 2.3 Ommaviy oferta — Provayder va Foydalanuvchi o'rtasida «UzCloud» xizmatidan foydalanish imkoniyatini taqdim etish shartlarini tartibga soluvchi shartnoma.
• 2.4 Platforma — «UzCloud» bulutli xizmatlar majmuasi: virtual serverlar, fayllarni saqlash, ilovalar platformalari va boshqa bulutli infratuzilma yechimlari.
• 2.5 Ro'yxatdan o'tish — Platforma tizimida Foydalanuvchining hisob yozuvini (akkauntini) yaratish jarayoni.
• 2.6 Hamyon — faqat «UzCloud» tizimida amal qiladigan to'lov vositasi bo'lib, balansni to'ldirish va xizmatlar uchun avtomatik to'lov imkonini beradi.
• 2.7 Ish to'xtashi vaqti — kutilmagan holatlar tufayli tizimdagi nosozliklar (kiberhujumlar, apparatli nosozliklar, elektr uzilishi, Internet uzilishlari).
• 2.8 Zaxiraviy nusxalash — haftada bir marta disk ma'lumotlarini saqlaydigan pullik xizmat (oxirgi 4 hafta uchun nusxalar saqlanadi).
• 2.9 Suratlar (Snapshot) — serverdagi ma'lumotlar joylashuvi haqida ma'lumot saqlaydigan fayl.
• 2.10 Qo'llab-quvvatlash uchun arizalar tizimi — Foydalanuvchining ro'yxatdan o'tgan akkaunti orqali Provayderga murojaat qilish kanali.
• 2.11 To'lov davri — Provayder tomonidan Prepaid/Postpaid foydalanuvchilariga xizmatlar uchun to'lov hisoblanadigan davr.
• 2.12 Qo'pol qoidabuzarlik — xavfsizlikka tahdid soluvchi harakatlar: kriptovalyuta mayningi, zararli dasturlar, kiberhujumlar, torrent-tarmoqlar, mualliflik huquqini buzish.
• 2.13 Server ma'lumotlari — Foydalanuvchi tomonidan uning serveri doirasida kiritilgan ma'lumotlar.
• 2.14 Nofaol maqom — elektron pochta yoki telefon raqamini tasdiqlamagan Foydalanuvchining maqomi.
• 2.15 Oddiy maqom — qarzdorligi bo'lmagan Foydalanuvchining maqomi, cheklovlarsiz xizmatdan foydalanish imkoni mavjud.
• 2.16 To'xtatilgan maqom — belgilangan muddatda qarzni to'lamagan Foydalanuvchi: bulutli server vaqtincha to'xtatilgan.
• 2.17 Bloklangan maqom — belgilangan muddatda to'lovni amalga oshirmagan Foydalanuvchi: server o'chirilgan, kirish to'liq bloklangan.
• 2.18 Yopiq maqom — o'z akkauntini ixtiyoriy ravishda yopgan yoki faolsizlantirgan Foydalanuvchining maqomi.
• 2.19 Fors-major — tomonlar nazoratidan tashqarida bo'lgan kutilmagan holatlar: yong'in, zilzila, urush, terrorchilik, pandemiya, davlat organlarining qarorlari va boshqalar.
• 2.20 Foydalanuvchi — shartnomaga ega bo'lgan va bulutli xizmatlardan faol foydalanuvchi.
• 2.21 Loyiha — bulutli virtual serverlarni ma'lum bir toifaga guruhli birlashtirish.
• 2.22 Bazaviy verifikatsiya — SMS yordamida elektron pochta va mobil raqamni verifikatsiya qilish orqali shaxsni tasdiqlash.
• 2.23 Tarif rejasi — belgilangan shartlarga muvofiq foydalanuvchiga taqdim etiladigan xizmatlar to'plami va narxlar.

III. Ro'yxatdan o'tish

3.1. Platformadan foydalanish uchun Foydalanuvchilar uzcloud.uz rasmiy veb-saytida ro'yxatdan o'tishlari kerak.

3.2. Ro'yxatdan o'tishda barcha kerakli ma'lumotlar aniq va to'liq taqdim etilishi shart.

3.3. Har bir foydalanuvchiga faqat bitta elektron pochta manzili bilan ro'yxatdan o'tishga ruxsat beriladi. Avval foydalanilgan email va telefon raqamlar qayta ishlatilmaydi.

3.4. Platforma shaxsiy ma'lumotlar va server ma'lumotlarini saqlaydi. Tizimga kirish parollari, bank kartalari parollari va serverlarga kirish parollari saqlanmaydi.

3.5. Hisob ma'lumotlari yo'qolgan taqdirda, Foydalanuvchi parolni tiklash shakli orqali mustaqil ravishda tiklash jarayonini boshlashi mumkin.

3.6. Ro'yxatdan o'tgan, ammo verifikatsiyadan o'tmagan Foydalanuvchilar uchun xizmatlardan foydalanish imkoniyati cheklanadi.

IV. Provayderning huquq va majburiyatlari

4.1. Provayder Foydalanuvchilardan ushbu Shartlarga rioya qilinishini talab qilish huquqiga ega.

4.2. Provayder foydalanilgan barcha turdagi bulutli xizmatlar uchun to'lov undirish huquqiga ega.

4.3. Provayder hisobda pul mablag'lari yo'qligi sababli Foydalanuvchining barcha xizmatlarini darhol to'xtatib qo'yish huquqiga ega.

4.4. Foydalanuvchi to'lovni amalga oshirmaganligi sababli virtual server o'chirilganidan keyin 5 kun ichida xizmat uchun to'lovni amalga oshirmasa — Provayder zaxiraviy nusxalarni yaratadi, serverning o'zi butunlay o'chiriladi. «To'xtatilgan» holatidan keyin 20 kun ichida «Qayta tiklash» bosilmasa — barcha ma'lumotlar o'chirib tashlanadi.

4.5. Provayder Foydalanuvchining ma'lumotlarini butunlay o'chirib tashlagan bo'lsa, ularni tiklab bo'lmaydi.

4.6. Provayder foydalanuvchilarga suratlar (snapshot) yaratish va har hafta zaxiralash (oyiga 4 tagacha nusxa) imkoniyatini beradi, shuningdek, qo'shimcha pullik zaxiralash xizmatlarini taklif qilish huquqiga ega.

4.7. Provayder Foydalanuvchi zaxiraviy nusxasini yaratmaganligi sababli yuzaga kelgan yo'qotishlar uchun javobgar emas.

4.8. Infratuzilma ishdan chiqqan taqdirda, Provayder Foydalanuvchining oldindan roziligisiz favqulodda choralar ko'rish, xizmatlarni to'xtatib turish huquqiga ega.

4.9. Serverda jiddiy xavfsizlik muammolari mavjud bo'lsa, Provayder uni to'xtatadi, Foydalanuvchini xabardor qiladi va tegishli choralar ko'radi.

4.11. Provayder virtualizatsiya infratuzilmasini muntazam ravishda yangilashi va takomillashtirishi shart.

4.13. Provayder Foydalanuvchilarga arizalar tizimi, telefon yoki elektron pochta orqali qo'llab-quvvatlash xizmatini taqdim etishi shart.

4.15. Provayder foydalanuvchilarga dasturiy ta'minot uchun pullik litsenziyalarni taklif qilish huquqiga ega.

4.16. Yangilanishlar tufayli xizmat vaqtincha to'xtatilsa, foydalanuvchilar ro'yxatdan o'tgan elektron pochta orqali kamida 1 kun oldin xabardor qilinishi kerak.

4.17. Provayder Platformada taqdim etilgan mahsulot va xizmatlarni taklif qilish va sotish huquqiga ega.

4.18. Provayder xizmat ko'rsatish jarayonida olingan maxfiy ma'lumotlarni uchinchi shaxslarga berishga haqli emas (O'zbekiston Respublikasi qonunchiligida nazarda tutilgan holatlar bundan mustasno).

4.19. Provayder o'zgarishlar kuchga kirishidan kamida 10 kalendar kun oldin foydalanuvchilarni xabardor qilgan holda tarif rejalari va to'lov shartlarini o'zgartirish huquqiga ega.

V. Foydalanuvchining huquq va majburiyatlari

5.1. Foydalanuvchi Provayderdan ushbu Shartlarga muvofiq o'z majburiyatlarini bajarishni talab qilish huquqiga ega.

5.2. Foydalanuvchi xizmatlar sifatiga e'tiroz bildirish, yangi mahsulotlar so'rash, fikr-mulohaza bildirish huquqiga ega.

5.3. Foydalanuvchi qo'llab-quvvatlash xizmatiga so'rovlar va shikoyatlarni rasmiy email, telefon yoki boshqa kanallar orqali yuborish huquqiga ega.

5.4. Foydalanuvchi bulutli server bilan ishlashda xavflarni to'g'ri boshqarish bo'yicha maslahatlar olish huquqiga ega.

5.5. Foydalanuvchi Provayder tomonidan taqdim etilgan hisoblarga muvofiq xizmatlar haqini belgilangan muddatda to'lashi shart.

5.6. Foydalanuvchi o'z hisob ma'lumotlarining maxfiyligini saqlash uchun javobgar. Hisob ma'lumotlarini uchinchi shaxslarga berish bilan bog'liq barcha xatarlar foydalanuvchi zimmasida.

5.7. Foydalanuvchi taqiqlangan kontentni saqlash, qayta ishlash yoki tarqatish uchun Platformadan foydalanish huquqiga ega emas: konstitutsiyaviy tuzumni zo'ravonlik bilan o'zgartirishga chaqirish, urushni targ'ib qilish, zo'ravonlik va pornografiya, diniy va milliy nizolarni qo'zg'atish, inson sha'nini kamsitish va O'zbekiston Respublikasi qonunchiligi bilan taqiqlangan boshqa ma'lumotlar.

5.8. Provayderning birinchi talabiga ko'ra, Foydalanuvchi 24 soat ichida taqiqlangan kontentni Platformadan o'chirib tashlashi shart.

5.11. Foydalanuvchi to'lanmagan hisoblar tufayli Platformadan foydalanishni cheklash bilan bog'liq xatarlarni to'liq o'z zimmasiga oladi.

5.12. Agar Foydalanuvchi zaxiraviy nusxadan foydalanmasa, serverdagi ma'lumotlarning xavfsizligi va tashqi tahdidlar uchun to'liq javobgar bo'ladi.

5.13. Foydalanuvchi operatsion tizimni o'z vaqtida yangilash, zaifliklarni bartaraf etish va xavfsizlikni kuchaytirish choralarini ko'rishi shart.

5.14. Xizmatlardan foydalanishni qayta boshlashdan oldin Foydalanuvchi barcha qarzlarni to'lashi, shu jumladan zaxiralar uchun to'lovni amalga oshirishi shart.

VI. To'lov shartlari — Umumiy qoidalar

6.1.1. Jismoniy shaxslar xizmatlar uchun to'lovni Prepaid shartlari asosida amalga oshiradilar. Yuridik shaxslarga xizmatlar Postpaid shartlari asosida ko'rsatiladi.

6.1.2. Hisob-kitob davri bir kalendar oyni tashkil etadi va xizmatlar faollashtirilgan sanadan qat'i nazar, barcha Foydalanuvchilar uchun har oyning birinchi sanasiga bog'lanadi.

6.1.3. Foydalanuvchi xizmatga birinchi marta oyning o'rtasida ulansa, qiymat qolgan kunlarga mutanosib hisoblanadi: A / B × C = D, bu yerda A — tarif bo'yicha to'lov, B — joriy oydagi kunlar, C — qolgan kunlar, D — to'lanishi kerak bo'lgan summa.

6.1.4. Xizmatlar narxi tanlangan mahsulotlar va ularning texnik xususiyatlari asosida aniqlanadi.

6.1.5. To'lov milliy valyuta — so'mda amalga oshiriladi.

6.1.6. Foydalanuvchi Platformada ko'rsatiladigan xizmatlar uchun to'lovni o'z vaqtida amalga oshirishi shart.

6.1.8. Agar foydalanuvchi hamyonining balansini oldindan to'ldirgan bo'lsa, xizmat uchun oylik to'lov avtomatik ravishda hisobdan yechib olinadi.

6.1.9. Shartnoma bekor qilinganda hamyondagi foydalanilmagan mablag'lar qaytarilmaydi.

VI. To'lov shartlari — Yuridik shaxslar

6.2.1. Xizmatlar Postpaid shartlarida ko'rsatiladi — to'lov ko'rsatilgan xizmatlar uchun amalga oshiriladi.

6.2.2. Yuridik shaxslar xizmatlar uchun soatbay, kunlik tariflash asosida yoki oylik obuna bo'lish orqali to'lovni amalga oshirishi mumkin.

6.2.3. Xizmatlardan foydalanishning birinchi oyida Foydalanuvchi Shartnoma tuzilgan sanadan boshlab 3 bank kuni ichida to'lovni amalga oshirishi shart.

6.2.4. Dastlabki ulanish paytida Foydalanuvchi xizmat uchun to'lovni 100% miqdorida oldindan amalga oshiradi.

6.2.5. Hisobvaraq-faktura har oyda shakllantiriladi va Foydalanuvchiga hisobot oyidan keyingi oyning 5-kunidan kechiktirmay yuboriladi.

6.2.6. Foydalanuvchi hisobvaraq-faktura taqdim etilgandan so'ng 10 kun ichida to'lovni amalga oshirishi shart. Muddat o'tkazib yuborilsa, Provayder foydalanishni vaqtincha to'xtatish huquqiga ega.

6.2.7. To'lov naqd bo'lmagan pul shaklida, Shartnomada ko'rsatilgan Provayderning hisob raqamiga amalga oshiriladi.

6.2.8. Agar to'lov belgilangan muddatda amalga oshirilmasa, xizmat ko'rsatish u o'tkazilgunga qadar to'xtatib turiladi.

6.2.9. Hisob-kitob davri mobaynida sarflanadigan resurslar hajmi ko'payganda, Tomonlar qo'shimcha bitim tuzadilar.

6.2.10. Xizmatlar uchun haq to'lash majburiyati, ulardan haqiqatda foydalanilishidan qat'i nazar, Shartnoma rasman bekor qilingunga qadar Foydalanuvchida saqlanib qoladi.

VI. To'lov shartlari — Jismoniy shaxslar

6.3.1. Xizmatlar oldindan to'lov (Prepaid) shartlarida taqdim etiladi.

6.3.2. Foydalanuvchi to'lovlarni amalga oshirish uchun Platformada mavjud to'lov tizimlaridan foydalanishi mumkin.

6.3.3. Jismoniy shaxslar xizmatlar uchun soatbay, kunlik tariflash asosida yoki oylik obuna bo'lish orqali to'lovni amalga oshirishlari mumkin.

6.3.4.1. Kunlik tariflash: mablag'larni hisobdan yechish har kuni belgilangan narxga muvofiq amalga oshiriladi. Balansda mablag'lar yetarli bo'lmasa, to'ldirilgunga qadar xizmatdan foydalanish cheklanadi.

6.3.4.2. Oylik obuna: mablag'lar tarifga muvofiq avans tarzida hisobdan yechiladi. Obuna avtomatik ravishda uzaytiriladi. Foydalanuvchi yangi hisob-kitob davri boshlangunga qadar shaxsiy kabinetida obunani bekor qilishi mumkin.

6.4.1. Foydalanuvchi hisob-kitob davri mobaynida tarif rejasini o'zgartirishi mumkin, narxni qayta hisoblash qolgan vaqtga mutanosib ravishda amalga oshiriladi.

6.4.2. Jismoniy shaxslar qo'shimcha resurslar uchun oldindan to'lovni amalga oshiradilar; yuridik shaxslar uchun qo'shimcha resurslar qiymati keyingi hisobvaraq-fakturaga kiritiladi.

6.4.3. Misol: 1 vCPU / 1 GB RAM / 10 GB SSD dan 2 vCPU / 4 GB RAM / 20 GB SSD ga yangilashda faqat qo'shilgan resurslar uchun qolgan vaqtga mutanosib farq to'lanadi: (1 vCPU × 71 000 + 3 GB RAM × 10 000 + 10 GB SSD × 22 000) / qolgan davr.

VI. Xizmatni to'xtatib turish va tugatish

6.5.1. Yangi hisob-kitob davri boshlangunga qadar to'lov amalga oshirilmasa, jismoniy shaxslar uchun xizmatdan foydalanish imkoniyati avtomatik ravishda to'xtatiladi.

6.5.2. To'xtatilgan xizmatlar balansdan mablag'lar muvaffaqiyatli yechib olingandan so'ng avtomatik ravishda qayta tiklanadi.

6.5.3. Shartnomani bekor qilish uchun yuridik shaxs Provayderning info@uzcloud.uz elektron pochtasiga xabarnoma yuborishi shart. Shartnoma xabarnoma olingandan so'ng 15 kalendar kun o'tgandan keyin bekor qilingan hisoblanadi.

6.5.4. Jismoniy shaxslar shaxsiy kabinetda obunani bekor qilishi yoki xizmatlardan voz kechishi mumkin.